NIGRÁN XOGA EN EQUIPO POLA INFANCIA: DEZ ANOS DE COMPROMISO SOCIAL LEMBRANDO A PILAR VALERO O CB Nigrán presentou a X edición da súa Basket Sen Barreiras que recadará fondos para Aldeas Infantís O Club Baloncesto Nigrán presentou no Auditorio de Nigrán a X edición do Torneo Solidario Basket Sen Barreiras, unha cita moi especial que se celebrará os próximos días 30 e 31 no pavillón municipal de Panxón. Este evento, xa consolidado como un referente deportivo e solidario, conta coa colaboración da Federación Galega de Baloncesto, o Concello de Nigrán e o centro Juan María, e nesta décima edición destinará todos os seus esforzos a apoiar o labor de Aldeas Infantís. Durante o acto de presentación proxectouse un emotivo vídeo que repasou unha década de compromiso, deporte e solidariedade. Dez anos nos que o club demostrou que o baloncesto pode ser moito máis que unha competición: unha ferramenta para transformar realidades. Como recoñecemento a este camiño compartido, entregáronse detalles conmemorativos ás entidades que formaron parte desta historia solidaria, entre elas a Asociación Española contra o Cancro, Bicos de Papel, AFAGA, 700 camisetas contra a Leucemia, AEEA ou o centro de Educación especial JUAN MARÍA, AMFIV, así como a Aldeas Infantís, protagonista desta edición. O acto contou coa presenza de representantes de todas as asociacións, a vicepresidenta da Federación Galega de Baloncesto, Susana García e o alcalde de Nigrán, Juan González, quen quixo mostrar o seu apoio a unha iniciativa que une deporte e compromiso social. Esta décima edición tivo tamén un momento especialmente emotivo ao lembrar a figura de Pilar Valero, madriña do torneo desde a súa primeira edición e referente dentro e fóra da cancha. O seu compromiso co deporte e, sobre todo, coas causas sociais, deixou unha pegada indeleble no club e en todas as persoas que forman parte de Basket Sen Barreiras. O seu espírito solidario, a súa proximidade e a súa paixón polo baloncesto seguen moi presentes neste torneo, que continúa crecendo fiel aos valores que ela representou desde o inicio. Este décimo aniversario convértese así tamén nunha homenaxe ao seu legado, lembrando que a súa forma de entender o deporte —como unha ferramenta para axudar aos demais— segue viva en cada edición. Nesta ocasión, o torneo pon o foco no importante labor de Aldeas Infantís SOS, unha organización que traballa para garantir que nenos, nenas e mozas en situación de vulnerabilidade poidan crecer nunha contorna familiar segura e con oportunidades de futuro. A través de programas de protección, educación e apoio a familias, a súa misión é que ningún neno creza só, ofrecendo non só coidados, senón tamén afecto, estabilidade e un fogar. Cada xogador e xogadora participante realizará un donativo en concepto de inscrición, que será depositado nunha urna solidaria instalada no pavillón durante os dous días de competición. Familias, asistentes e veciños tamén poderán sumarse a esta causa achegando o seu granito de area. Ademais, celebraranse distintos sorteos solidarios, destinando integramente a recadación a Aldeas Infantís. O torneo desenvolverase en xornada de mañá e tarde, con tres pistas habilitadas nas que competirán equipos de distintos clubs como Porriño Baloncesto Base, CAB Pontevedra C.D. Miralba ou CB Redondela, entre outros. Preto de 600 nenos e nenas daranse cita neste evento. Todos os encontros estarán arbitrados por membros do Comité da Federación Galega de Baloncesto, que colaboran de forma desinteresada, reforzando o espírito solidario do evento. O tecido comercial local tamén se envorcou coa iniciativa, demostrando unha vez máis a forza da comunidade cando se une por unha boa causa. Durante a rolda de prensa, a directora deportiva do CB Nigrán subliñou que “a liña deportiva do club sempre vai da man de iniciativas sociais, porque cremos firmemente no deporte como vehículo para educar, sensibilizar e construír unha sociedade máis xusta”. En definitiva, Basket Sen Barreiras celebra dez anos lembrándonos que cada pase, cada canastra e cada esforzo na pista pode converterse nunha oportunidade real para cambiar vidas fóra dela, mantendo vivo o legado de quen fixo deste torneo algo moito máis grande que o deporte.
.jpg)
.jpg)
%20(1).jpg)
